Chistu è lu secunnu jornu di la simana dû Sicilianu. Lu nostru jurnali voli prisintari arrè li ninni nanni di li nostri nonni. Lu pezzu scrittu di lu prufissuri Cudia ‘n Italianu lu truvati cca’.
0:00
/
0:00
Ninna nanna ninna ò
- nonna di Giada
Vattinni a lu testu
La siminzina – cantau Rosamaria Mauro
Ninna nanna ninna nanna
fai la ninna e fai la nanna.
Fai la ninna cori di mamma
fai la ninna e fai la nanna.
Bò bò bò, ora veni lu patri to
e ti porta la siminzina,
la rosamarina
e lu basiricò.
Bò bò bò, fai la ninna e fai la vò.
Bottu bottu bottu, sentu chiànciri un picciottu
e ci dissi picciottu chi ài.
E c’hâ ‘viri? Mi maritai.
Bò bò bò, fai la ninna fai la vò.
E alaò – cantau la nonna Pina
Bò bò bò
tutti dòrminu e tu no.
E alaò ed a la beḍḍa
dormi sta figghia ch’è nicareḍḍa
e alaò.
Ed alaò la mamma un cci eni
si nni jìu a la missa
a Santa Marìa
pi fari vèniri lu sonnu a tia
e alaò.
Bò bò bò
tutti dòrminu e tu no.
E alaò ed a la beḍḍa
dormi sta figghia ch’è nicareḍḍa
e alaò.
‘N menzu all’aranci e a li lumìa
cc’era Gisuzzu chi durmìa
pi fari vèniri lu sonnu a tia
e alaò.
Bò bò bò
tutti dòrminu e tu no.
E si stu figghiu ‘un voli dòrmiri
naticateḍḍi àv’ad aviri.
Na ninnaredda – cantau Rosamaria Mauro
Quannu la Sant’Anna l’annacava
a la Vìrgini Maria,
figghia beḍḍa la chiamava
fai la vò figghiuzza mia
e chiudi l’occhi e arriposa
e fai la vò ‘un chiànciri cchiù
scocca di rosa.
Jivi apposta a lu jardinu
pi cugghìriti tanti ciuri,
rosi, gigghi e girsuminu
tanti ciuri chi fannu uduri
pi priparàriti la nacuzza.
E fai la vò ‘un chianciri cchiù
figghia Maruzza.
Fai la vò, fai la vò
fai la vò, fai la vò.
T’accattau un tilareḍḍu
pi nzignàriti a raccamari
si lu vidi quantu è beḍḍu!
Cc’è la vugghia e lu jiditali,
e cc’è la sita, l’argentu e l’oru
e fai la vò ‘un chiànciri cchiù
duci trisoru.
Fai la vò, fai la vò
fai la vò, fai la vò.
La siminzina – cantau la nonna di Marika
E bò e bò e bò
ora veni la mamma to
e ti porta la rosamarina, la siminzina e lu basiricò
Ninna nanna ninna ò – cantau la nonna di Giada
Ninna nanna ninna ò – nonna di Giada
Ninna nanna ninna ò
chi pacenzia chi cci vo’ […]
lo daremo alla befana
che lo tiene una settimana
lo daremo all’uomo nero
che lo tiene un anno intero
lo daremo al suo papà
che lo porta di cca e di ḍḍà.
Chi hai chi chianci – cantau Vitalba
E alaò
chi ài, chi chianci?
La naca è fatta ‘n menzu all’aranci
E alaò
‘N menzu all’aranci e a li lumìa
pi fari vèniri lu sonnu a tia.
E alaò
la mamma ‘un cc’eni
si nni jìu a la missa
e ora veni.
E alaò
Ninna nanna ninna ò – di Vitalba
Ninna nanna ninna ò – di Vitalba
Ninna nanna ninna ò
stu picciriḍḍu àv’a fari bobò
e si bobò ‘un voli fari
lignateḍḍi àv’a ‘bbuscari.
E si bobò ‘un voli fari
lignateḍḍi àv’a ‘bbuscari.
Ninna nanna ninna nanna
dormi figghiu di la mamma,
di la mamma e di Gisù
stu picciriḍḍu ‘un chianci cchiù.
E di la mamma e di Gisù
stu picciriḍḍu ‘un chianci cchiù.