‘N Sicilia la pasta si cala e di sòlitu si nni càlanu du’ fila. Semu quattru cristiani a manciari? Calamu du’ fila di pasta, chi ponnu èssiri quattru o cincucentu grammi. La pasta ‘un àv’a mancari! Semu cincu? Sempri du’ fila nni calamu, pirò stavota sunnu cincu, sei o setticentu grammi. Addipenni si semu di manciata o no.
La cosa beḍḍa è chi quannu dicemu accussì, sapemu chi âm’a mèttiri pasta longa.
N’atra manera di misurari li cosi tuttu sicilianu è chiḍḍu di misurari lu tempu chi passa. Lu tempu pi nuiautri è cchiù longu assai di l’autri banni. Turnamu a lu discursu di lu “poi si vidi”, ‘n pràtica.
Si dumanni a to maritu:
Abbirsa stu rubbinettu chi perdi
Iḍḍu t’arrispunni:
ora!
Ma stu ora veni a diri “quannu àju tempu lu fazzu, picchì p’accamora m’annoia”
Poi, l’appuntamenti chi damu, pi esempiu, su’ tranquilli, senza troppu prescia.
– A chi ura ni videmu?
– Di pumiriggiu
No a li setti, a li setti e trentacincu, all’ottu menu un quartu. Di pumiriggiu…
Poi quannu jemu nni quarchi pajisi p’agghiri ḍḍà ncapu, chi àvi la metrupulitana, e liggemu: “tempo d’attesa 1 minuto e mezzo”, ni sintemu pigghiati pi fissa. E chi è stu minutu e menzu? Lu minutu e menzu nuiautri siciliani mancu lu sintemu. Lu trenu pi jiri di Tràpani a Ragusa cci metti trìdici uri e ottu minuti… si ‘un porta ritardu. Lu scrivi puru lu Jurnali di Sicilia.
Picchì nuiautri prescia ‘un nn’avemu.
E mancu avemu lu tempu futuru. Usamu lu tempu prisenti e n’abbasta: “Dumani si vidi”, “L’annu pròssimu mi maritu”.
E ora chi schicavi comu misuramu li cosi, mi vaju a calu du’ fila di pasta.
Ringraziamu David Paleino, Prisidenti di la Cademia Siciliana, chi abbirsàu l’articulu.
