Quannu la sira n’assittàvamu fora a lu friscu, o dintra davanti a lu focu, la nonna mi taliàva e mi dicìa accussì:
Li piducchieḍḍi di Ciccu Ficara mìsiru mpignu pi fari na pira: cci nn’era unu di setti “cantàra” chi cu la cuda scutulava pira! Caucia e punci lu sceccu assicuta la mula e ‘n cursa si l’acchianava li timpuna e talì fu lu zi’ Vituni chi pi sbagghiu misi lu vinu nna lu sali e lu sali nna lu vinu! Li me parenti tantu ristrinceru ch’accattaru un tumazzeḍḍu tantu caru, nna la cascia lu mittèru cridènnusi chi bonu lu sarbaru. Li surci chissu stissu lu caperu… scinneru cu li stigghi e lu scassaru… di ḍḍu tumazzeḍḍu nenti nni lassaru!!!! Mischina di mia lu attu ‘un m’avìa cadutu malatu chi li surci m’avìanu patrunijatu!!!
Tri tri p’un tarì
setti fìmmini p’un tarì.
Lu tarì a pocu a pocu
setti fìmmini p’un varcocu.
Lu varcocu è duci duci
setti fìmmini pi ‘na nuci.
La nuci è dura dura
setti fìmmini pi na mula.
La mula ecca càvuci
setti fìmmini pi na fàvuci.
La fàvuci avi li denti
setti fìmmini p’un serpenti.
Lu serpenti è ‘milinatu
setti fìmmini p’un ranatu.
Lu ranatu avi li coccia
setti fìmmini pi na boccia.
La boccia è ruzzulusa
setti fìmmini pi na busa.
La busa è fina fina
setti fìmmini pi na tina.
La tina ecca acqua
setti fìmmini pi na vacca.
La vacca avi li corna
picchi pacchi e lu cuntu un torna.
Bammineḍḍu di Caltanissetta, tuttu lu jiornu facìa quasetta.
E facìtinni una a mia, chi vi dicu l’Avi Marìa.
Tu si bamminu, vattinni a la scola.
La mamma ti chiama, la missa ti sona.
Trentatrì anni, curuna di spina.
Ferru e catina p’amari a Gesù.